O mes de abril, ademais da chegada da primavera, celebramos os días do Libro e o Libro Infantil. Por iso, dende a Asociación de Veciños e Socio-Cultural O Quinteiro de Buño convídamosvos a participar nun roteiro literario polo noso pobo o próximo sábado 18 de abril. Pasaremos a tarde camiñando por tres dos nosos fornos máis emblemáticos e compartindo experiencias a carón dos libros.

PROGRAMA DE ACTIVIDADES
SÁBADO, 18 DE ABRIL

16:00 h. – FORNO DOS MOURÓNS: BUÑO CONTA.

Comezamos o roteiro no forno do barrio dos Mouróns, onde os veciños e veciñas compartiremos historias: de tradición oral ou de nova creación, das que xa forman parte do noso imaxinario colectivo ou outras máis novidosas, empregando só a voz ou apoiándonos no formato libro, individualmente ou en grupo… porque Buño sempre tivo moito que contar.

Como participar?: para organizar esta primeira actividade, se queres participar na sesión de contacontos, ponte en contacto connosco no teléfono 686700766. Anímate e conta!

17:00 h. – FORNO DO FORTE: A VERDADEIRA HISTORIA DE HAMELÍN.

A través do sendeiriño que conecta o barrio dos Mouróns co barrio do Fono Novo, chegamos ao Forno do Forte; onde nos espera unha adaptación circense do clásico conto: O Flautista de Hamelín, da man de MeRe Clown, fundador e co-director da Compañía de Espectáculos e Animación Moc Moc. 

Bromas sen fin, participación do público e humor, moito humor, son as claves desta adaptación circense do clásico conto “O frautista de Hamelín”, no que descubriremos o que sucedeu en realidade. A través do clown, os malabares, o xogo e a participación do público, unha persoa alí presente contarannos como a aldea de Hamelín foi tomada por unha praga de raros seres que molestan e fan imposible a vida dos seus habitantes. Xa coñecedes a historia que vos querían contar… é hora de coñecer “A verdadeira historia de Hamelín”.

18:15 h. – FORNO DA COSTA: MERENDA LITERARIA.

A última parada deste roteiro é no barrio da Costa, onde nos espera un mercadillo de libros de segunda man a prezos populares e a favor da asociación de veciños. O recaudado servirá para financiar ésta e futuras actividades. Despois da subida ao Forno da Costa poida que precisemos repoñer forzas, así que as lecturas estarán acompañadas de chocolate quentiño.

Se alguén quere donar libros para o mercadillo, pode facelo a través de calquera membro da directiva ou contactando a través de CONTACTAR.

Esperámosvos o día 18 no Roteiro Literario.

Se o tempo non nos acompaña, todas as actividades terán lugar nun único espazo: o Forno do Forte.